E m 0 t i o n

မတ်လ၏ နွေညများ

“ဟယ်”
ခရီးရောက်မဆိုက် ဒေါ်လေးရဲ့ ရှည်လျားလှတဲ့ အံ့အားတသင့် အာမေဋိတ်သံက ဆီးကြိုလိုက်တဲ့အပြင် ဘေးမှာရှိနေတဲ့ မေမေရဲ့ ကွက်ခနဲပျက်သွားတဲ့ မျက်နှာတို့ကို ကြည့်ရင်း နွေ ကြောင်သွားသည်။
“ကလေးကို လာတွဲပြီး အိပ်ရာထဲကို ပို့ပေးလိုက်ပါ”
မေမေက ဒေါ်လေးကို လှမ်းပြောလိုက်သော်ငြား နွေ လက်ခါပြလိုက်ရင်း ဗိုက်ကလေးကို နှိပ်ပြလိုက်သည်။
“သြော် သမီး အပေါ့သွားချင်လို့လား။ ဒေါ်လေး ခေါ်သွားလိမ့်မယ်လေ။ မေမေ အထုပ်လေးတွေ ချလိုက်ဦးမယ်နော်”
ပြောရင်းဆိုရင်း ကားနောက်ခန်းမှ ဓာတ်ဘူး၊ ရေခွက် အစုံထည့်ထားသည့် ခြင်းတွေ အိတ်တွေကို မေမေနဲ့ မမတို့က ချနေသည်။
သြော် အိမ်ကို ပြန်ရမှာမို့ ပျော်နေခဲ့တဲ့ ခံစားချက်က ခုတော့လည်း တစ်မျိုးပါလား။
နွေ တွေဝေနေသည်။ စိတ်သွားတိုင်း မပါနိုင်သည့် ခန`ဓာကိုယ်ကို လေးကန်စွာ သယ်ဆောင်ရင်း ဘေးမှ တွဲထားသည့် ဒေါ်လေးကို အားနာစွာ ကြည့်လိုက်သည်။
“သမီးလေး တော်တော်နေကောင်းသွားပြီပဲ။ လာလာ၊ ပြီးရင် တံခါးခေါက်လိုက်နော်။ ဒေါ်လေး ဒီရှေ့မှာပဲ ရှိနေမယ်”
နွေ အားယူကာ ရေချိုးခန်းထဲ ၀င်လိုက်သည်။ မှန်... မှန်ဘယ်မှာဘဲ။
“နေမကောင်းတဲ့လူက မှန်းမကြည့်ရဘူး သမီးရဲ့၊ မှန်ကြည့်ရင် ရောဂါက တော်တော်နဲ့ မပျောက်တတ်ဘူးတဲ့”
ဆေးရုံမှာရှိနေစဉ်တစ်လျှောက်လုံး မေမေတို့က မှန်မပြခဲ့။ ခု ရေချိုးခန်းထဲမှ မှန်ကရော။ နွေ မျက်မှောင်လေးတစ်ချက်ကြုတ်ကာ ထိုင်ချလိုက်သည်။ ရင်ထဲမှ ပျို့အန်ချင်သလိုလို။ တံခါးကို အဆက်မပြတ် ထုလိုက်သည်။
“သမီး ပြီးပြီလား”
အပြုံးတစ်စနှင့် ဒေါ်လေးက လှမ်းမေးလိုက်သော် နွေ ပါးစပ်ကို လက်ညှိုးထိုးပြလိုက်သည်။
“အန်ချင်လို့လား၊ သမီး အန်ချင်လို့လား။ မအန်ပါနဲ့ သမီးရယ်၊ မအန်ပါနဲ့။ မေမေ့ကိုသနားရင် မအန်ပါနဲ့”
လက်ထဲမှ အထုပ်တစ်ထုပ်ကိုပစ်ချရင်း မေမေ ပြေးလာလေသည်။ နွေ ကိုယ်လေးကို တောင့်လိုက်ကာ လက်ဖ၀ါးထဲကို စာရေးဟန်ပြလိုက်သည်။
“ကလေး notepad ပေး”
မမကို မေမေ လှမ်းအော်သည်။
“သမီး မအန်ချင်ပါဘူး မေမေရယ်၊ ဒါပေမဲ့ အလိုလို ပျို့နေတယ်”
ရေးရင်း မျက်ရည်တွေ ၀ဲလာသည်။
“သမီး လှဲချင်တယ်၊ အိပ်ရာထဲ ပို့ပေးပါ”

---

နေ့လယ် 11 နာရီ 40 မိနစ်။

သူနာပြုဆရာမလေးနှစ်ယောက် ရောက်လာကာ နွေ့ကို လာခေါ်သည်။ မေမေက နွေ့လက်ဖ၀ါးလေးကို ဆုပ်ထားသည်။
“အ၀တ်အစားတွေ ချွတ်လိုက်ပါနော်၊ ပြီးရင် ဒီဟာလေး ၀တ်ပေးပါ”
မေမေက နွေ့ထံလှမ်းပေးသော အစိမ်းရောင်ဝတ်ရုံရှည်ကြီးကို လှမ်းယူကာ နွေ့ကို ၀တ်ပေးသည်။
“အို အကုန်ချွတ်ရမှာရှင့်၊ ဒီဝတ်ရုံတစ်ထည်ပဲ ၀တ်ပေးပါ”
သူနာပြုဆရာမလေးစကားကိုကြားတော့ နွေ တွန့်သွားသည်။ မေမေ့ကိုပင် ရှက်ရွံ့ ဟန်ဖြင့် လှမ်းကြည့်တော့ မေမေက စိုးရိမ်ထိတ်လန့်မှုများကြားက ပြုံးပြလိုက်သေးသည်။
“သမီး ဘာမှမကြောက်နဲ့နော်။ ဆရာဝန်ကြီးက အရမ်းတော်တာ။ ခုတင်ပေါ်ရောက်တာနဲ့ သမ`ဗုဒေ`ဓ ရွတ်နေနော်သမီး”
“ရပါပြီ၊ ကျွန်မနဲ့ လိုက်ခဲ့ပါ”
သူနာပြုဆရာမလေးခေါ်ဆောင်ရာနောက် လိုက်သွားသော နွေ့ခြေလှမ်းများ သာမာန်ထက် ပိုမိုတောင့်တင်းနေတာ မေမေသိသွားမှာစိုးသဖြင့် နွေ ခပ်သွက်သွက်လှမ်းလိုက်သည်။
“ခေါင်းအုံးကို ဖယ်လိုက်”
“အောက်ဆီဂျင်ဘူး အသင့်ပြင်”
“ခေါင်းစွပ်က မလုံဘူး၊ ဆံပင်တွေ ထွက်နေသေးတယ်လေ။ အမြဲပြောတယ်၊ ဆံပင်ကို စုချည်ပြီးမှ ခေါင်းစွပ် စွပ်ပါလို့”
မျက်လုံးကို စုံမှိတ်ကာ ဘုရားစာရွတ်နေပါသော်လည်း ကြားနေရသော အသံများကို ဥပေက္ခာမပြုနိုင်။ ရုတ်တရက် ရင်ဘတ်အစုံအေးစက်သွားတော့ မျက်လုံးကို ကပျာကယာ ဖွင့်ကြည့်လိုက်မိသည်။ ရင်ဘတ်တစ်ဖက်တစ်ချက်တွင် အေးစက်စက် စတီးလ်ပြားနှစ်ခုကို ကပ်ထားတာ တွေ့ရသည်။ လက်ထဲကိုလည်း ဆေးထိုးအပ်တွေ ကြိုးတန်းလန်းနှင့် ထိုးကြသည်။ ရှုပ်ယှက်ခတ်နေသော မြင်ကွင်းများကိုကြည့်ရင်း နွေ အားလျော့သလို ခံစားလာရသဖြင့် မျက်စိအစုံကို ဇွတ်မှိတ်လိုက်ပြန်သည်။
“ဒါ မေ့ဆေးမဟုတ်သေးဘူးနော် သမီး၊ သမီး အားရှိအောင် ဆရာမကြီးက ထိုးပေးမှာ”
ဆရာဝန်မကြီးတစ်ယောက်က ညာလက်ထဲသို့ ဆေးထိုးရန်ပြင်ဆင်ရင်း ပြောလိုက်သည်။ ခုချိန်ထိ နွေ့ကို ခွဲစိတ်မည့် ဆရာဝန်ကြီးကို မတွေ့ရသေး။ လက်ဖျံမှ စူးခနဲ နာကျင်စွာ ခံစားလိုက်ရသည်။
“သမ`ဗုဒေ`ဓ“
“အတ္ထ၀ီသင်စ”

---

“နွေ အိပ်ပျော်နေတာလား၊ ရတယ် အန်တီ၊ သမီးတို့ စောင့်နေလိုက်မယ်လေ။ အန်တီ ခဏနားလိုက်ပေါ့”

“ရပါတယ် သမီးရယ်၊ သမီးလေးက အန်လို့မရဘူးလေ။ အဲဒါကြောင့် အနားမှာ မပြတ်စောင့်နေရတာ”
“သြော် ဟုတ်။ နွေ့ကို အော်ပရေးရှင်းလုပ်တဲ့နေ့က သမီးတို့အရမ်းစိတ်ပူနေတာ။ သမီးတို့က မဟာမြိုင်ဆေးခန်းမှာ နေ့လယ် နှစ်နာရီမထိုးခင် အမီ သွားစောင့်နေတာလေ။ အော်ပရေးရှင်းခန်းထဲကနေ 2 နာရီလောက်ထွက်ပြီး မဟာမြိုင်ကို ရောက်မယ်ပြောတာကိုး။ နောက် ရောက်မလာလို့ ဆေးခန်းမှာ ၀င်မေးတော့ ခုထိ သတိမရသေးလို့ မလာသေးတာလို့ပြောတော့ တအားစိတ်ပူသွားတာ။ ဒီကြားထဲ သူ့ဖုန်း တတီတီကိုလည်း ပြန်ဖြေရသေးတယ်”
“ဟုတ်တယ် သမီးရယ်၊ ဆရာဝန်ကြီးက 11 နာရီ 45 စပြီး 2 နာရီလောက်ဆို ပြီးပြီလို့ ပြောသွားတာ။ 3 နာရီလည်း ထွက်မလာ၊ 4 နာရီလည်း ထွက်မလာ။ အန်တီ့မှာ ရွတ်ရဖတ်ရတာလည်း စုံလို့။ နောက်တော့ ဆရာဝန်ကြီးက ထွက်လာပြီး မိန်းကလေးက အားနည်းတာရော၊ အားငယ်တာရော ပေါင်းပြီး ခုထိ သတိမရသေးဘူး။ စိုးရိမ်စရာတော့ မရှိဘူး၊ အမေ ၀င်ကြည့်လို့ရတယ် ပြောလို့ အန်တီဝင်သွားတော့ သမီးက ခုတင်ပေါ်မှာ လုံးဝသတိမရသေးဘူး။ 4 နာရီခွဲလောက်ကျတော့မှ နည်းနည်းလှုပ်လာတယ်။ ဒါပေမဲ့ မျက်စိက ကောင်းကောင်းမဖွင့်သေးဘူး။ သမီး သတိရလား။ မေမေ့ကို မှတ်မိလား၊ မြင်လား မေးတော့ ခေါင်းညိတ်ပြတယ်။ ပြီးတော့ ချက်ချင်းပြန်အိပ်သွားတယ်။ သူနာပြုဆရာမကတော့ မေ့ဆေးအရှိန်ကြောင့် ကောင်းကောင်းမနိုးသေးတာလို့ပြောတယ်။ အဲဒီနေ့က သား မပါဘူးနော်”
“ဟုတ်တယ် အန်တီ၊ တိုက်တိုက်ဆိုင်ဆိုင် အဲဒီနေ့က ရုံးမှာ project အသစ် စလုပ်ရတဲ့နေ့။ အဲဒီမတိုင်ခင်ကတည်းက ကြိုသိနေရတာ။ project လုပ်ဖို့ကတော့ ရက်ပြောင်းလို့မရဘူးလေ။ တခြား အဖွဲ့ဝင်တွေလည်း ရှိသေးတော့။ မဖြစ်မနေ ကျွန်တော် ပျက်လိုက်ရင် ရပေမဲ့ နွေကလည်း နင် မလာပါနဲ့။ project ပြီးရင်သာ ငါ့ကို ပြန်ရှင်းပြဆိုလို့ မလာတော့တာ။ ဒါပေမဲ့ ရုံးကနေတော့ ကျွန်တော် သူတို့ဆီ ဖုန်းဆက်ဆက်ပြီး မေးနေတာ။ ခုရော သူ ဘာစားလို့ရလဲ။ ဆေးခန်းကရော ဘယ်တော့ ပြန်ပြရမှာလဲ အန်တီ”
“အင်း တစ်လခွဲလောက်ထိကို ထမင်းမပြောနဲ့၊ အဖတ် ဘာအဖတ်မှ စားလို့မရဘူး။ ကြက်သားကို ပေါင်းပြီး အရည်ကိုတောင် ရေစစ်နဲ့စစ်ပြီးမှ တိုက်ရတယ်။ အနည်က ပါတဲ့ အဖတ်လေးတောင် စားလို့မရဘူး။ အရည်ကြည်ကြည်ပဲ တိုက်ရတယ်။ ရင်ထဲမှာ အစာမရှိတော့ ပူတာပေါ့သမီးရယ်၊ နေကလည်း တအားပူ၊ မီးကလည်း မမှန်တော့ နေ့ခင်းဘက်ဆို အိပ်ရာထဲမှာ မနေနိုင်ဘူးဆိုပြီး ရေချိုးခန်းထဲ ပိုက်ဖျာလေးခင်းပြီး ၀င်နေတယ်။ အန်တီ့မှာ အအေးပတ်မှာစိုးလို့ ပြောနေရပေမဲ့ သူ ဘယ်လိုမှမနေနိုင်တော့လည်း စောင်တွေထပ်ခင်းပြီး အဲဒီပေါ်မှာ လှဲခိုင်းရတာပဲ။ ဘေးက ကြွေပြားတွေကို လက်နဲ့ပွတ်လိုက်၊ အောက်က စောင်လွတ်တဲ့နေရာလေးကို လက်နဲ့ပွတ်လိုက်နဲ့”
“ဟုတ်တယ် ကျွန်တော်တို့ ပုံမှန်လူတွေတောင် နေ့ခင်းဆို အပြင်မထွက်ချင်လောက်အောင် ပူတာ။ ဆရာဝန်ကြီးက မဟာမြိုင်မှာတုန်းက ဘာပြောသေးလဲ အန်တီ၊ အကုန် အိုကေတယ်တဲ့လား”
“အင်း သူက အားရတယ်လို့ပြောတယ်။ သမီးငယ် ပထမဆုံး ဆေးခန်းသွားတဲ့အချိန်ကို အန်တီ့ကို ပြန်ပြောပြသေးတယ်။ အမေ ပါမလာဘူးလားမေးတော့ မေမေ စိတ်မကောင်းမှာစိုးလို့ လို့ပြောတယ်တဲ့။ အဲဒါ အော်ပရေးရှင်းလုပ်ရင် ဖြစ်နိုင်မလား၊ ဘယ်လောက်ကုန်မလဲ အစုံပေါ့။ ဆရာဝန်ကြီးက သမီးက အရမ်းလိမ္မာတဲ့ ကလေးပဲ၊ မဖြစ် ဖြစ်အောင် လုပ်ပေးရမှာပေါ့။ သမီးက အရမ်းနောက်ကျနေပြီ။ တခြားသူဆို မလုပ်ပေးတော့ဘူး။ ဒါပေမဲ့ သမီးကိုတော့ လုပ်ပေးမယ်ဆိုပြီး ဘာတွေ လုပ်ရမယ်ဆိုတာ ပြောပြလိုက်တယ်တဲ့။ နောက်တစ်ခါလာရင်တော့ မေမေ့ကို ခေါ်လာခဲ့ဆိုပြီး မှာလိုက်ရတယ်တဲ့”
“အင်း ဟုတ်တယ်၊ အဲဒီတုန်းက သူ့မျက်နှာမကောင်းလို့မေးတော့ ဘာမှမဟုတ်ဘူးတဲ့။ ပြီးတော့ နင့်မှာ စုထားတဲ့ပိုက်ဆံ ဘယ်လောက်လောက်ရှိလဲတဲ့။ သမီးစိတ်ထင် အန်တီ့ကို မပြောဘဲ သူ့ဘာသူ လုပ်လို့ရရင် လုပ်လိုက်မယ်ဆိုတဲ့ စိတ်ရှိတယ်။ သူ့ခံစားရတဲ့ ဝေဒနာကို အန်တီသိသွားလို့ စိတ်မကောင်းဖြစ်မှာ တအားကြောက်တယ်ထင်တယ်”
“ဟုတ်တယ်၊ အဲဒါကြောင့်လည်း အန်တီ ပိုပြီးစိတ်မကောင်းဖြစ်တာ။ သူက အမေကို အရမ်းချစ်တာလေ။ အဲဒီတုန်းက အန်တီက ဘုရားဖူး သွားဖို့ ပိုက်ဆံတွေဘာတွေ သွင်းပြီးပြီ။ အဲဒီကိစ္စ သိလိုက်ရတော့ မသွားတော့တာတောင်မှ မေမေ သွားပါ၊ ပြန်လာမှ လုပ်မယ် ပြောသေးတယ်။ ဆရာဝန်က အတတ်နိုင်ဆုံး မြန်လေ ကောင်းလေပဲလို့ ပြောတာတောင်မှ။ ဒါနဲ့ သားတို့ သမီးတို့လည်း ဆေးရုံတက်တုန်းကလည်း လာရ၊ အိမ်ကိုလည်း ခဏခဏလာရနဲ့”
“ရတယ် အန်တီ၊ နွေ့ကိုကြည့်ပြီး စိတ်မကောင်းတာပဲ။ သူမြန်မြန်နေကောင်းပါစေလို့ပဲ ဆုတောင်းရတယ်”
“ဟုတ်တယ်၊ အန်တီလည်း သူ့အတွက် အချိန်ရတိုင်း ရွတ်ဖတ်ပေးနေရတာပဲ။ အဓိဋ္ဌာန်တွေလည်း ၀င်တယ်။ သနားတယ်သမီးရယ်၊ ဘာမှလည်း မစားရ၊ စကားလည်း မပြောရဆိုတော့။ သမီးတို့ ခဏထိုင်ဦးနော်၊ အန်တီ အောက်မှာ သမီးကြီးကို ပြောစရာရှိလို့”
“ရတယ် ရတယ် အန်တီ၊ စိတ်ချလက်ချသွားပါ”

---

“နွေ၊ ဒါ နင့်အတွက် ဆုတောင်းပြီး လုပ်ထားတာ။ အားလုံးကို ငါကိုယ်တိုင်လုပ်ထားတာနော်။ ပြီးတော့ ဒါက notepad။ နင် အော်ပရေးရှင်းလုပ်ပြီးရင် စကားမပြောရဘူးဆိုတော့ ဒါက လိုအပ်မှာပဲ”
ခေါင်းရင်းဘက် ရှိုးကေ့စ်ထဲမှ သူငယ်ချင်းပေးထားသော ကြယ်ဘူးလေးကို ထုတ်ကာ ကြယ်ပွင့်လေးများကို အိပ်ရာပေါ် သွန်ချလိုက်သည်။ ဖောင်းဖောင်းအိအိ ကြယ်ပွင့်လေးများက အရောင်အသွေးစုံဖြင့် ချစ်စဖွယ် တောက်ပလျက်။ ရုတ်တရက် သတိရလိုက်မိသဖြင့် notepad ကို ဆွဲယူလိုက်သည်။
“နွေ၊ နင့်အတွက် ငါ ကဗျာတစ်ပုဒ် စပ်ထားတယ်။ ဒီ notepad ထဲမှာ။ ဖတ်ပြီး နင် ကျိတ်ရယ်မနေနဲ့နော်”

အမြဲလိုလို
ကြည်လင်တဲ့ အပြုံး
တိတ်ဆိတ်စိတ်ငြိမ်မှုနဲ့
စိုးထိတ်တဲ့နင့်အကြည့်တွေက
ငါ့ခင်မင်မှုကို ဖဲ့ချခဲ့တယ်။

တစ်ခါတစ်ရံ
အပြုံးတွေဆိတ်သုဉ်း
တက်ကြွလှုပ်ရှားမှုတွေနဲ့
ထီမထင်တဲ့ နင့်အကြည့်တွေက
ငါ့စိတ်တွေကို ညှို့ယူခဲ့တယ်။

နှုတ်ခမ်းနီ မဆိုးနဲ့နော်ဆိုတဲ့ ချစ်သူ
နှုတ်ခမ်းနီမလေးနောက် ပါသွားတဲ့ ပုံပြင်တွေ
ဆံပင်ရှည်ထားပါလားဆိုတဲ့ ချစ်သူ
ဆံပင်ရှည်တွေနဲ့ တုပ်နှောင်မထားနိုင်ခဲ့တာလည်းရှိသလို
အသံတွေရဲ့ကဝေ “စပီးယား” လည်း
သူ့ချစ်သူ Dancer လေးကို
အသံတွေနဲ့ မဆွဲဆောင်နိုင်ခဲ့ဘူး။

အရာရာဟာ နေသားတကျပြီးဆုံးသွားမှာပါလို့တွေးတဲ့နေ့
အဲဒီနေ့မှာ
မျက်စိတ်ကို မှိတ် စိတ်ကို သွေးလို့
သီချင်းတစ်ပုဒ်ဆိုကြည့်
အရာရာဟာ နေသားတကျ ပြီးဆုံးသွားပါလိမ့်မယ်။

သူငယ်ချင်းလေး
ငါ နင့်အနားမှာ အမြဲရှိချင်တယ်
နင်ရယ်ရင် လိုက်ရယ်ဖို့
နင်ငိုရင် ချော့မြှူဖို့
နင်စိတ်ဓာတ်ကျတဲ့အခါ အားပေးဖြေသိမ့်ဖို့။

နွေ သည်ကဗျာလေးကို အကြိမ်ပေါင်းမည်မျှ ဖတ်ပြီးသည် မသိ။
ကျေးဇူးပါ သူငယ်ချင်းရယ်ဟု စိတ်ထဲက ခပ်တိုးတိုးရေရွတ်လိုက်မိသည်။ တစ်နေ့ကျရင်တော့... နွေ မျှော်လင့်ခဲ့တဲ့ အဲဒီတစ်နေ့ဆိုတာ ရှိခဲ့ရင်ပေါ့... သူငယ်ချင်းနဲ့ ယှဉ်တွဲလမ်းလျှောက်ရင်း သီချင်းတွေ အကျယ်ကြီး အော်ဆိုလိုက်ချင်သည်။ အရင်တုန်းက မလုပ်ခဲ့ဖူးသော အပြုအမူမျိုး နွေ ပြုဖူးချင်သည်။ အရာရာကို စိတ်လွတ်ကိုယ်လွတ် တစ်ခါလောက်တော့ ခံစားကြည့်ချင်သည်။

---

“သမီးဆေးရုံတက်နေတုန်းက မဂ`ဂဇင်းတိုက်က ဖုန်းဆက်တယ်။ ဆရာ “လေး” တဲ့။ သမီးရုံးကိုဆက်တော့ နေမကောင်းလို့ ခွင့်ယူထားတယ်ဆိုလို့ အိမ်ကိုဆက်လိုက်တာတဲ့။ ဒေါ်လေးလည်း ဘာပြန်ပြောရမှန်းမသိတာနဲ့ သမီးနေကောင်းတဲ့အခါ ဖုန်းပြန်ဆက်ခိုင်းလိုက်ပါ့မယ်လို့ပဲ ပြောလိုက်တယ်”
ဆေးပုလင်းကို လှုပ်ခါရင်းက ဒေါ်လေး ပြောသည်။ ပြီးနောက် ခွက်လေးထဲသို့ ဆေးထည့်ကာ မီလီ အချိန်အဆကို တိုက်ကြည့်နေပြန်သည်။
“15 မီလီသောက်ရတဲ့ဆေးက ပူရှိန်းရှိန်းနဲ့လို့ သမီးပြောတယ်နော်။ အဲဒါကောင်းတာပေါ့ သမီးရဲ့၊ ဒေါ်လေးဆို ပူရှိန်းရှိန်း သိပ်ကြိုက်၊ နေဦး သမီးအမေကို ခေါ်လိုက်ဦးမယ် ဆေးတိုက်ခိုင်းဖို့”
ပြောရင်း ဒေါ်လေး အောက်ဆင်းသွားတော့ နွေ မဂ`ဂဇင်းတိုက်ကို သတိရသွားသည်။ ကဗျာ ပါလာလို့များလား။ ဒါမှမဟုတ် ၀တ္ထုလား။
မေမေ့ကိုဖုန်းဆက်ခိုင်းရမည်။ နွေ စာမူလေးကို မြင်ချင်စိတ်တွေ တဖွားဖွားပေါ်လာသည်။ သရုပ်ဖော်ပုံက ဘယ်လိုဆွဲထားမည်လဲ၊ ထိုအကြောင်းကို စဉ်းစားမိတော့ ရင်ခုန်သံတွေတောင် မြန်သွားသလိုလို။ ပွင့်အံကျမလာသော ကဗျာတစ်စကို ညည်းလိုက်စဉ် ဝေဒနာကို နွေ လုံးလုံးမေ့လျော့သွားလေသည်။
ရင်ထဲက အနုပညာကို
နှလုံးသားနဲ့ စာစီပြီး
တိတ်ဆိတ်မှု သံစဉ်ပေါ်မှာ
စိတ်တွင်းက ခပ်ပါးပါးရွတ်ဆိုတယ်
ကဗျာက ရင်ဘတ်ထဲမှ အပြည့်အ၀ထွက်ကျမလာခဲ့။ တချို့ကဗျာတွေ နွေ အကုန်မမှတ်မိတော့။ မေ့ဆေးအရှိန်မပြေသေးရ်ျများလားဟု သံသယ၀င်မိသည်။ ဖြစ်နိုင်သည်။ နွေရေးခဲ့ဖူးသော ကဗျာတွေ၊ ၀တ္ထုတွေ အားလုံးကို နွေ့နှလုံးသားထဲမှာ အကန့်လိုက် အကန့်လိုက် သိမ်းဆည်းထားသည်ပဲ။ အချိန်မရွေး လိုအပ်သလို ထုတ်ယူစားသုံးသည်။ အရည်ကြည်ကြည်သာ သောက်ရပြီး အဖတ်လုံးဝမစားရပါဘဲလျက် နွေ ကောင်းမွန်စွာ အသက်ရှင်သန်နေတာပဲမဟုတ်လား။ ဘုရားဂုဏ်တော်တွေကို နွေ ယုံကြည်ကိုးစားသည်။ အနုပညာကို မြတ်နိုးသည်။ နောက်ဆုံးဆိုတဲ့အချိန်ထိ နွေ လုပ်နိုင်သမျှတွေ လုပ်သွားချင်သည်။

---

အိပ်မပျော်နိုင်တဲ့ ညများစွာထဲက တစ်ညမှာ နွေ ကဗျာလေးတစ်ပုဒ် ရေးလိုက်သေးသည်။
ထိုညက...
ဝေဒနာကို အပြင်းအထန်ခံစားရသဖြင့် နွေ အိပ်မရ။ အချိန်က ညဥ့်နှစ်ချက်ထိုးခါနီး။ ပင်ပန်းလွန်းသဖြင့် အိပ်ပျော်နေသော မေမေ့ကို ကြည့်ကာ နွေ သနားနေမိသည်။
“မေ မေ”
နွေ အကျယ်ကြီး အော်သည်။ ရှိုက်ကြီးတငင်ငိုရင်းက အကျယ်ကြီးအော်လိုက်သည်။ သို့သော် စိုးစဉ်းမျှထွက်မလာသော အသံက အိပ်ပျော်နေသူတစ်ယောက်ကို နိုးထစေမည်တဲ့လား။ မေမေ့ကို နှိုးလိုသော ဆန္ဒလည်း နွေ့ထံတွင် မရှိပါ။ သို့သော် အလိုလိုနေရင်း လှိုက်တက်လာသည့် ရင်ထဲက ၀မ်းနည်းမှုကိုမူ မဖြေဖျောက်နိုင်။ ဘာအတွက်လဲ၊ ဘာကြောင့်လဲ။ နွေ့မှာ အဖြေမရှိ။ စိတ်သောကဆိုတာ မိမိ မယူရဘဲ တင်နေတဲ့ အကြွေးအတွက် အတိုးပေး စုရခြင်းဖြစ်တယ်။
ဝန်ထုပ်ဝန်ပိုးတွေနဲ့ လေးလံပြီးသား ဘ၀တစ်ခုကို အပိုဝန်ဆောင်မှု မဖြစ်စေနဲ့ဟု စာအုပ်တစ်အုပ်မှာ နွေ ဖတ်ဖူးသည်။ Do not take life too seriously. You will never get out of it alive (ဘ၀ကို သိပ်ပြီး ပြင်းပြင်းထန်ထန် လေးလေးနက်နက် မခံယူပါနဲ့။ အဲဒီအထဲက သင် အသက်ရှင်ပြီး ထွက်လာနိုင်မှာမဟုတ်ဘူး) တဲ့။ ဟုတ်သည်။ ဝေဒနာကို နွေ တွန်းလှန်ရမည်။ သူ့ကို ခံစားနေလျှင် သူက နွေ့ကို အနိုင်ယူသွားမည်လေ။ နွေ တခြားတစ်ခုခုကို စဉ်းစားဖို့ပြင်သည်။ ဘာဖြစ်နိုင်မလဲ၊ နွေ ဘာကိုစဉ်းစားရမလဲ။ နွေ ဖေဖေ့ကို သတိရလိုက်သည်။ ဟိုးငယ်ငယ်က ဖေဖေနဲ့အတူ လေဆိပ်တာဝါပေါ်မှာ တက်ထိုင်ကြတာ အမှတ်ရသည်။ ခုနေ အဲဒီနေရာလေးမှာသာ ထိုင်လျက် ဖေဖေ၊ မေမေတို့နဲ့ တူတူနေနေရရင် နွေ ဝေဒနာကို မေ့လျော့နေနိုင်ကောင်းသည်။ မဟုတ်သေးဘူးလေ၊ တခြားတစ်ခုကို စဉ်းစား၊ သို့သော် နွေ ဖေဖေ့ကိုပင် ထပ်မံသတိရမိသည်။ အဲဒီတုန်းက ဖေဖေ့ရုံးခန်းခြံဝင်းထဲက ဆီးချိုသီးတွေ ခူးစားကြသည်။ ဖေဖေက ရေဆေးပေးသည်။ ဘာမှမဆိုင်ပါဘဲ ဆီးချိုသီးစားလိုက် ရေခဲရေသောက်လိုက်နှင့် ပြုံးပျော်နေခဲ့ကြသည်။ ရုတ်တရက် ထိုင်းပန်းရနံ့ သင်းသင်းလေးကို ရှူရှိုက်မိသလိုလို။ ဖေဖေက အမြဲရေစိမ်ပေးထားတတ်သည်ပဲ။ “သမီးလေးက လေယာဉ်မယ်လေးနဲ့တူတယ်” သမီးတွေကိုချစ်လွန်းသဖြင့် တစ်ခါဖူးမျှ မရိုက်ရက်ခဲ့သော ဖေဖေ။ ရင်ထဲက တလှပ်လှပ် လှိုက်တက်လာပြန်သည်။ မျက်ရည်တွေက ပိုးပိုးပေါက်ပေါက်။ မဟုတ်သေးဘူး၊ နွေ ဘာကိုမျှမစဉ်းစားချင်တော့။ အသံတိတ် နွေ့ရှိုက်သံတွေက ရင်ထဲမှာ ပဲ့တင်ထပ်နေသည်။ notepad ကို လှမ်းယူလိုက်သည်။ စိတ်ကို တည်ငြိမ်အောင်ထားရင်း ကဗျာတစ်ပုဒ်ရေးဖို့ ကြိုးစားသည်။
2 နာရီ 45 မိနစ်၊ 3 နာရီ... လက်တံတွေ တစ်ချက်ချင်း ရွေ့လျားနေသည့်အလိုက် နွေ့လက်ချောင်းကလေးတွေလည်း တစ်ချက်ချင်း လှုပ်ရှားနေသည်။ နောက်ဆုံး ရေးပြီးသွားချိန်မှာ ​ကဗျာလေးကို စ ဆုံး တစ်ခေါက် ပြန်ဖတ်လိုက်သည်။ အနည်းဆုံး အချိန်တစ်ခုတော့ နွေ သက်သာရာရသွားသည်ပဲ။ ဒါ အနုပညာရဲ့စွမ်းအားပဲမဟုတ်လား။ ခေါင်းစဉ်ကို နွေ စဉ်းစားသည်။ စဉ်းစား မရ။ နောက်များမှပေါ့။ ခုတော့ မနက်ဖြန်ဆိုတာ မပီပြင်သေးခင် ညတစ်ညကို ကောင်းစွာပုံဖော်ရဦးမည်။ ခန`ဓာရှိရင် ဝေဒနာရှိမယ် ဟူရ်ျ နွေ ကြားနာဖူးသည်။ ယခုလည်း ခန`ဓာတည်သရွေ့ မမြဲခြင်းတရားထဲမှာ နွေ လည်ပတ်ရဦးမည်လေ။

---

မနက်ကျလျှင် မဂ`ဂဇင်းတိုက်သို့ သွားရမည်။ စာမူခ နှင့် မဂ`ဂဇင်း သွားယူရန်ဖြစ်သည်။ notepad လေးကို အိပ်ရာဘေးတွင် ထောင်လိုက်သည်။ ဟိုးတစ်ညက နွေရေးခဲ့သော ကဗျာလေး ဖြစ်သည်။ ထိုကဗျာလေးကို မမှိတ်မသုန် စိုက်ကြည့်ရင်း မျက်လုံးတွေ အညောင်းကို နွေ စောင့်သည်။ နွေ အိပ်ချင်ပါသေးသည်။ သို့သော် အိပ်စက်ခြင်း မဲ့၊ လှုပ်ရှားခြင်းမဲ့စွာဖြင့် နွေ ငြိမ်နေမိသည်။ ထိုစဉ် နံဘေးမှာ အိပ်မောကျနေပြီဖြစ်သော မေမေ့ထံမှ အသံထွက်လာသည်။ “သမီး အိပ်ပျော်ရဲ့လား” တဲ့။ နွေက “ဟုတ်” ဟု ပြန်လည်ဖြေလိုက်ငြား မေမေ့ထံမှ အသံမထွက်လာတော့။ မေမေ ပြန်လည်အိပ်မောကျနေလေပြီ။ သြော် အိပ်မက်ထဲမှာတောင် နွေ့ကို မေမေ စိတ်မချနိုင်ပါလား။ ရည်ရွယ်ချက်မရှိပါဘဲ ကဗျာတစ်စကို နွေ ညည်းလိုက်သည်။ စကားလုံးတွေက တိုးလျလျ။ နွမ်းပါးသော အသံတော့မဟုတ်။ လေးနက်မှုအပြည့်ပါသော၊ သို့သော် နှေးကွေးလှသော ကဗျာရွတ်သံ။

ကိုယ့်ကို လူတွေက အေးတယ်တဲ့
တကယ်တော့ အေးတာဟာ ငြိမ်ဆိတ်ခြင်း၊ ငြိမ်းချမ်းခြင်း
တစ်နည်း
ဘ၀အပေါ် အသံတိုးပြခြင်းပါ
တိတ်တိတ်နေခြင်းဟာလည်း
ဘ၀ရဲ့အသံကို ပိတ်လိုက်ခြင်း မည်တယ်
ကိုယ် အေးအေးလေးနေချင်ခဲ့တယ်
အစွန်းအစကလေးတောင်မထွက်ဘဲ
အနားသတ်ညီညာတဲ့မျဉ်းထဲ ကိုယ်နေထိုင်ချင်ခဲ့တယ်
ဒါပေမဲ့
အမြဲညံဆူနေတဲ့ကမ္ဘာကြီးထဲ
ဘ၀ရဲ့အသံတွေကို ပိတ်ပြီး
ကျုံ့ကျုံ့လေး ကိုယ်နေထိုင်တယ်
ကိုယ် တိတ်တိတ်ကလေးပဲ နေပါတယ်။

စကတည်းက ရယူလိုစိတ်မရှိတဲ့
ကိုယ့်အချစ်ရဲ့ ရင်နင့်အောင်ရိုးသားခဲ့ခြင်းအပေါ်လည်း
ဦးနှောက်အသိညာဏ်က နာကျင်စွာ လက်ခံခဲ့တယ်
ကိုယ်ပိုင်ဆိုင်တာ ဘာလဲ
တရားသဘောအရ ရှိခြင်းဟာ ပျက်ခြင်း
ဒီလိုနဲ့
ကိုယ် ဘ၀ရဲ့အသံတွေကိုပိတ်
တိတ်တိတ်ကလေးပဲ နေပါတယ်။

ကိုယ်နေထိုင်တဲ့အခန်းရဲ့နံရံတွေဟာ
အနွေးဓာတ်ကိုပေးပါတယ်
မမြင်နိုင်တဲ့ လက်တစ်စုံကလည်း
ကိုယ့်ကို ကာဆီးပေးပါတယ်
ဒါပေမဲ့
ကိုယ့်နှလုံးသားအေးစက်မှုကိုတော့ မလုံခြုံစေခဲ့တာ အမှန်ပဲ
ဒီအတွက် မျှော်လင့်ခြင်းမဲ့မဟုတ်တဲ့ ရောင့်ရဲခြင်းမျိုးနဲ့
ကိုယ် ဘ၀ရဲ့အသံတွေကိုပိတ်
တိတ်တိတ်ကလေးပဲ နေပါတယ်။

ကိုယ့်နှလုံးသားစေခိုင်းသလို ရင်ဖွင့်ခွင့်ရှိတဲ့
တစ်ခုတည်းသောအရာအဖြစ်နဲ့ ကဗျာတွေရေးခဲ့တဲ့ ကိုယ်ဟာ
တစ်ခါတစ်ခါလည်း အရမ်းလူသားဆန်နေတတ်ပြန်တယ်
ပိုင်းခြားတတ်တဲ့ အသိညာဏ်၊ ခံစားတတ်တဲ့ နှလုံးသား
မသေချာမှုများနဲ့
ကြာတော့
ကိုယ် ကဗျာရေးရမှာကြောက်လာတယ်
ရင်ထဲကလာတဲ့ စကားလုံးတွေ ရင်ထဲမှာ မျိုချ
မြေကြီးကလာတဲ့ လူတွေ မြေကြီးထဲ ပြန်သွားရ ဆိုတဲ့စကား ကြားယောင်ရင်း
ကိုယ် ဘ၀ရဲ့အသံတွေကိုပိတ်
တိတ်တိတ်ကလေးပဲ နေပါတယ်။

ကဗျာရွတ်သံက နှေးသထက် နှေးလာသည်။ နောက်ဆုံး တိမ် ၀င် ပျောက် ကွယ်။
နွေ အိပ်ပျော်သွားလေပြီလား၊ သို့မဟုတ် တိတ်တိတ်ကလေး ငြိမ်နေသလား နွေကိုယ်တိုင် မရေရာတော့ပါ။

ရှိနေဆဲပါ ကြယ်...

တနင်္ဂနွေတစ်နေ့မှာ ဆရာက topic တစ်ခု ချပေးတယ်။
ီDescribe an important thing in your life တဲ့။ အဲဒါနဲ့ပတ်သက်ပြီး essay တစ်ပုဒ်လည်း လက်တန်းချရေးဖို့ ၄၅ မိနစ် အချိန်ပေးတယ်။ ကျွန်မဘ၀မှာ အရေးအကြီးဆုံးဆိုတဲ့အရာကို များများစဉ်းစားဖို့ မလိုပါဘူး။ အချိန်တိုင်း ကျွန်မဦးနှောက်ထဲ၊ အရိုးထဲ၊ နှလုံးသားထဲထိ စွဲထင်နေတဲ့ ကျွန်မရဲ့ လမ်းပြကြယ်လေးပဲပေါ့။ ၄၅ မိနစ်ဆိုတဲ့ အချိန်အတိုင်းအတာဟာ သာမန်လူတွေအတွက်တော့ ပိုလွန်းနေမှာဖြစ်ပေမဲ့ ကျွန်မအတွက်တော့ အစပျိုးလောက်ရုံပဲ ရှိပါတယ်။ တကယ်တော့ ဒီအကြောင်းအရာနဲ့ ပတ်သက်ပြီး ပြောရရင် ကျွန်မဘ၀တစ်ခုလုံးကို ပြောပြရမှာလေ။ လွန်ခဲ့တဲ့ ၁၅ နှစ်၊ ကျွန်မအသက် ၈ နှစ် သမီးက ရခဲ့တဲ့ လမ်းပြကြယ်ဟာ အဲဒီအချိန်ကစလို့ စက္ကန့်တိုင်း၊ မိနစ်တိုင်းမှာ ကျွန်မဘ၀ရဲ့ အရေးကြီး အစိတ်အပိုင်းတွေမှာ ပါဝင်ပတ်သက်နေခဲ့ပါတယ်။

*

၄၅ မိနစ်ဆိုတဲ့ အချိန်ကန့်သတ်ချက်ကို Time's up ဆိုတဲ့ ဆရာ့ရဲ့အသံက အတည်ပြုသတ်မှတ်လိုက်တဲ့အခါ ကျွန်မတို့အားလုံး ပြီးဆုံးခြင်း အနေအထားကို ရောက်ရှိနေပါပြီ။

"First Row, Joanne"

ဆရာ့ရဲ့မူအရ essay တစ်ပုဒ် ရေးပြီးတိုင်း တစ်ယောက်စီ အလှည့်ကျ အတန်းရှေ့ထွက်ပြီး ကိုယ်ရေးခဲ့တဲ့ essay ကို တစ်တန်းလုံး ကြားအောင် ရွတ်ပြရပါတယ်။ ကိုယ့်အလှည့်မဟုတ်လို့ အာရုံစိုက် နားမထောင်ချင်လို့လည်း မရပါဘူး။ တစ်ယောက်ဖတ်ပြီးသွားတိုင်း ကျန်တဲ့ အတန်းသားတွေကို ဆရာက စိတ်ကြိုက် လက်ညှိုးထိုးပြီး ရွတ်ပြသွားတဲ့ essayို ကိုယ်နားလည်သလို ပြန်ပြောခိုင်းတတ်တာမို့ တစ်တန်းလုံးရဲ့ အာရုံဟာ essay ရဲ့ အနှစ်သာရအပေါ်မှာပဲ ကျရောက်နေတတ်ပါတယ်။

လူတွေရဲ့ဘ၀မှာ အရေးကြီးဆုံးပစ္စည်း ဆိုတာတွေဟာ အမျိုးမျိုးပါပဲ။ အများအားဖြင့်တော့ ဈေးနှုန်းသတ်မှတ်ချက်အရ တန်ဖိုး မြင့်ကြတာပေါ့။ တချို့က လည်ဆွဲ တဲ့။ အချိန်တိုင်းဆွဲထားတာ အိပ်နေရင်တောင် မချွတ်ဘူးလို့ပြောတယ်။ တချို့ကျတော့ အရုပ်၊ မွေးပွရုပ်တဲ့။ တစ်ရုပ်ပျက်သွားတဲ့အခါ နောက်တစ်ရုပ် ချက်ချင်းဝယ်တယ်။ အဲဒီအရုပ်မရှိရင် မနေတတ်အောင် ဘ၀မှာ အရေးပါသတဲ့။ တချို့ကျတော့လည်း နားကပ်၊ တချို့ကျတော့လည်း ကား တဲ့။ ကိုယ့်စိတ်ကူးနဲ့ ကိုယ်မို့ အားလုံးရဲ့စိတ်ကူးတွေဟာ ကျွန်မရဲ့နားထဲမှာ ဆန်းသစ်နေပါတယ်။ ကျွန်မဘ၀ရဲ့ အရေးကြီးဆုံးပစ္စည်းတွေကတော့ သူတို့ရဲ့နားထဲမှာ ငြီးငွေ့စရာ ဖြစ်နေမလားပဲ။

ရှေ့ဆုံးတန်းရဲ့ အစွန်ဆုံးခုံက ငါးယောက်မြောက်လူဖြစ်တဲ့ ကျွန်မအလှည့် ရောက်လာပါပြီ။
"Melinda"

ဆရာ့ရဲ့ အောင်မြင်ခန့်ညားတဲ့အသံက တည်ငြိမ်စွာ ထွက်ပေါ်လာပါတယ်။

ဆရာ့ကို ကျွန်မ စာအုပ်ကလေးပေးလိုက်တဲ့အခါ ဆရာက ok ဟု ပြောပြီး စာအုပ်ကလေးကို ဖွင့်လှန်လိုက်ပါတယ်။

ကျွန်မကိုယ်စား ဆရာက တစ်လုံးချင်း လေးနက်စွာ ဖတ်ပြပါတော့တယ်။ ရင့်ကျက်မှု၊ တည်ငြိမ်မှု၊ စာနာမှုတို့ ပြည့်နေတဲ့ ဆရာ့ရဲ့အသံဟာ တစ်တန်းလုံးရဲ့ အာရုံကို ဖမ်းစားနိုင်ခဲ့ပါတယ်။ ဆရာ့ဘေးမှာ ရပ်နေတဲ့ ကျွန်မကတော့ ကျွန်မရဲ့ essay ထဲမှာ အသက်ဝင်လှုပ်ရှားလို့ နေပါတယ်။

တကယ်တော့ ခုလို ကျွန်မရဲ့ လမ်းပြကြယ်လေးကို အများသူငါရှေ့မှာ ထုတ်ဖော်ပြောပြခွင့်ရဖို့ ဘယ်တုန်းကမှ မမျှော်လင့်ဖူးပါဘူး။

"My father gave me as my birthday present. He knew how the darkness and dreariness always got me down. What would have been more perfectly timed more attuned to my need"

ဆရာ့ရဲ့အသံက တစ်ချက်တစ်ချက် ကျွန်မနားထဲကို ၀င်ရောက်လာပါတယ်။ တကယ်ပါ၊ ကျွန်မရဲ့ဝိညာဉ်က ဆရာ့ကို ပူးကပ်သွားသလိုမျိုး ကျွန်မဟာ စိတ်ရှိလက်ရှိ တစ်ကြောင်းချင်း အားရစွာ ဖတ်ပြနေပါတယ်။ တစ်ချိန်တည်းမှာပဲ ရုပ်ရှင်တစ်ကား အနှေးကွက်ပြသလို အာရုံမှာ ထင်ဟပ်လာခဲ့တယ်။

*

မှောင်လွန်းတဲ့ ညဟာ အဲဒီနေ့ကစလို့ ကျွန်မအတွက် အမြဲ လပြည့် ဖြစ်စေခဲ့တယ်။ အဖေဟာ ကျွန်မရဲ့ ၈ နှစ်မြောက် မွေးနေ့အတွက် ကျွန်မအိပ်ရာရဲ့ မျက်နှာကြက်မှာ တိမ်ဆိုင်တွေ အပြည့်တပ်ဆင်လို့ လပြည့်ည မီးသီး ၀ိုင်းစက်စက်လေးနဲ့အတူ အဏုမြူကြယ်လေး တပ်ဆင်ပေးခဲ့တယ်။ ညစဉ်ညတိုင်း အဖေနဲ့အတူတူ၊ တစ်ခါတစ်ရံ အမေနဲ့အတူတူ ကျွန်မကောင်းကင်ကို ကြည့်တယ်။ ကျွန်မရဲ့ကောင်းကင်ဟာ ကျွန်မအတွက်တော့ အမြဲ တစ်ရာသီပဲပေါ့။ ရက်ပေါင်း ၂၀ တိတိ ပြည့်တဲ့ တစ်နေ့မှာ အဖေက တခြားဘ၀တစ်ခုကို ကျွန်မထက်အရင် သွားနှင့်တယ်။ အဲဒီညမှာ တစ်ရာသီကောင်းကင်ကတောင် မိုးတွေရွာနေတာ ကျွန်မမျက်ဝန်းထဲမှာ တွေ့ခဲ့ရတယ်။ သည်းသည်းမည်းမည်းပါပဲ။

နောက်ပိုင်း အမေလာတဲ့ ညတွေမှာ အမေနဲ့အတူတူ ကျွန်မ ကောင်းကင်ကို ကြည့်ပြီး၊ တစ်ယောက်တည်းရှိတဲ့အခါတော့ ကျွန်မကောင်းကင်ပေါ်က အဖေနဲ့အတူ စကားတွေပြောတယ်။

"Hard times almost over. Hold on, keep going on, Light is coming soon"
အဖေဟာ ကောင်းကင်ပေါ်ကနေ ကျွန်မကို ညတိုင်း အဲဒီလို အမြဲပြောတတ်တယ်။
ဒုက္ခတွေ ငြိမ်းအေးပြီး ရဲရဲဝံ့ဝံ့ ဘ၀ခရီးကို လျှောက်စမ်း၊ ရပ်မနေနဲ့။ ဆက်ပြီးလျှောက်နော်၊ အလင်းရောင် လာတော့မယ်တဲ့။

ဆွံ့အခြင်း ဆိုတဲ့ ပျောက်ဆုံးနေတဲ့ ကျွန်မရဲ့ ဆည်းလည်းသံဟာ တစ်ခါတစ်ရံ ကျွန်မဘ၀ရဲ့ လမ်းကြောင်းကိုတောင် မှေးမှိန်စေပါတယ်။ ကိုယ့်ဘ၀ကိုယ် နာကြည်းမုန်းတီးစိတ်တွေဟာ အဖေ့ရဲ့ကောင်းကင်အောက်မှာတော့ ကျရှုံးသွားစမြဲပါ။ ကျွန်မဘ၀ လမ်းမပျောက်စေချင်တဲ့ အဖေ့ရဲ့ မေတ္တာနဲ့ အဖေ့ရဲ့လမ်းပြကြယ်ဟာ ကျွန်မရဲ့ ငြီးငွေ့စရာ အထီးကျန်ဘ၀ကို ရှေ့ဆောင်ပေးနိုင်ခဲ့တယ်။ သူတို့ကိုမြင်ရတိုင်း ကျွန်မအတွက် ယုံကြည်ချက်နဲ့ လုံခြုံမှုတွေ ပေးခဲ့ပါတယ်။

အဖေပြောပြတတ်တဲ့ ကမ္ဘာကျော်ပုဂ္ဂိုလ်တွေထဲမှာ ကျွန်မ ၀င်ရောက်ခံစားနိုင်ခဲ့တယ်။ သူတို့လိုမဖြစ်ရင်တောင် ကျွန်မဘ၀ အဓိပ္ပာယ်မဲ့ သေဆုံးမသွားဖို့ ကျွန်မရဲ့ လမ်းပြကြယ်လေးကို ကတိပေးနိုင်ခဲ့တယ်။

*

ှု I missed him terribly, though I know he would always be a part of me, together with the atomic star.

ဆရာ့ရဲ့ ရွတ်ဆိုသံအဆုံးမှာ ဆရာဟာ ကျွန်မကို တစ်ချက်လှမ်းကြည့်ပြီး ညေပာသမန လို့ မေးလာပါတယ်။ ကျွန်မ ခေါင်းဆတ်ပြလိုက်တဲ့အခါ ဆရာက marker ကို လှမ်းယူလိုက်ပြီး ကျွန်မကို ပေးတယ်။ ရင်ထဲမှာ ကျန်ရှိနေတာလေးတွေကို whiteboard ပေါ် ကျွန်မ ချရေးလိုက်တယ်။

"How is he now? Where is he? I felt guilty for having doubts, but sometimes, I thought, faith is so hard. Atomic star built my faith for a life time"