အမေ
July 18, 2007
ကလေးအရွယ်လူမမယ်ကပေါ့
ညအိပ်ရာဝင်ချိန်
အမေ့လက်နွေးနွေးနဲ့ ထွေးဖက်တဲ့အခါ
ရင်တစ်ခုလုံး အပျော်တွေစီးဆင်း
အမေရယ် တင်းတင်းကလေးဖက်ထားပါတဲ့။
အရွယ်ရောက်လူလားမြောက်တော့
ညအိပ်ရာဝင်ချိန်
အမေ့လက်နွေးနွေးနဲ့ ထွေးဖက်တဲ့အခါ
ရင်တစ်ခုလုံး မွန်းလျက်
အမေရယ် အသက်ရှူကျပ်ပါတယ်တဲ့။
ငယ်ငယ်က အမေ မေးခဲ့ဖူးတယ်
သမီးကြီးလာရင်ဘာလုပ်မလဲ
မပီကလာပီကလာဖြေခဲ့ဖူးတယ်
အင်ဂျင်နီယာကြီးလုပ်မယ်တဲ့။
ရွှန်းလဲ့မျက်ဝန်း
တောက်ပအပြုံးနဲ့
ဖြစ်အောင်သာကြိုးစား
ကျန်တာ အမေ့တာဝန်ထားတဲ့။
ကံကြမ္မာလှိုင်းလေ ၀ုန်းခနဲမွှေတယ်
အဖေသေတယ်
ဘာမှမလုပ်တတ်တဲ့အမေ ငုတ်တုတ်သာ ထိုင်ငိုနေတယ်
မျက်ရည်ကြားက တစ်ခွန်းတော့ပြောရဲ့ အမေစက်ချုပ်မယ်တဲ့။
အမှတ်စာရင်းကိုင်ထားတဲ့အမေ့လက်
တဆတ်ဆတ်တုန်နေတယ်
သမီးရယ်
အမေ ရင်တွေ အရမ်းခုန်နေတယ်တဲ့။
ကံကြမ္မာကိုအကြောင်းပြ
မထောင်းသာတဲ့ဘ၀မို့
အဝေးသင်တက်ဖို့ပြောတဲ့အမေ
တာဝန်မကျေဘူးတဲ့။
ကွယ်ရာမှာ မျက်ရည်သုတ်
အပူရုပ်ကို ဟန်လုပ်လို့
အမေ အမွေရခဲ့တယ်
သမီးကို ကျောင်းအပ်မယ်တဲ့။
အမေ့ရင်တွင်းခံစားချက် အလေးအနက်မထားခဲ့တဲ့သမီး
အမေ့ကျောပေါ်နင်းလို့ အမြင့်ကိုလည်း လှမ်းမတက်ချင်ပါဘူး
အခုတော့
အမေ့လက်နွေးနွေးတစ်စုံနဲ့
သမီးဘ၀တစ်သက် လုံခြုံပါပြီတဲ့။ ။
(သိုးလေးမျက်မြင်တွေ့ခဲ့ရတဲ့ အဖြစ်အပျက်ကလေးကို ခေါင်းထဲပေါ်လာတာနဲ့ ဒီစာသားလေးတွေ ရေးဖြစ်သွားတာပါ)
Posts
0 comments: to “ အမေ ”
Post a Comment