E m 0 t i o n

သားအဖဂစ်တာ

အဖေလည်း ငယ်ငယ်က ဂစ်တာကို လွယ်ခဲ့ဖူးမှာပဲ
ကျွန်တော့်ဂစ်တာကို အတင်းဖြုတ်ယူ
ဥပါဒ်တေးတွေ ပါ မပါ စစ်ဆေးရတယ်လို့
အဖေ့အတွက်တော့
ဂစ်တာဟာ
ကျေးလက်ဆီအလည်သွားဖို့ အုန်းခွံရောင်မြင်း
ကျွန်တော့်အတွက်တော့
သတ္တုမြို့ပျက်မှာ ဒုန်းစိုင်းမယ့် ဆိုင်ကယ်
အဖေက
ဂစ်တာကို အိမ်ဦးခန်းမှာ ရှေးဟောင်းဓားလိုထားတယ်
ကျွန်တော့်အတွက်တော့ ဂစ်တာဟာ မောင်းချဓားတစ်မျိုးပဲ
အဖေထင်သလိုတော့
အရောင်ကြောင်ကျားနဲ့ လေဆာဓာတ်ပြားတွေ မဟုတ်ဘူးပေါ့
ဓာတ်ပြောင်းကြီး ဖွင့်ချလိုက်ရင်
ကွန်ဆာဗေးတစ်သီချင်းတွေပဲ ထွက်ကျလာမှာ သိတယ်
လိုအပ်ရင် ခုနစ်ကြိုးတပ်ပြီး
မလိုအပ်ရင် ရိုက်ချိုးချင် ရိုက်ချိုးလိုက်မယ်
ဒါ... ကျွန်တော်တို့ခေတ်ရဲ့ လောကဓံကို
စည်းလိုက်နေတာပဲ အဖေ
ကျွန်တော်ကတော့
အနုပညာလှေဆိပ်မှာ ဂစ်တာတွေဆုံရင်
တစ်ယောက်နဲ့တစ်ယောက် ကြိုးညှိ
ကြယ်တွေဆီ ရွက်လွှင့်ကြည့်ကြမယ်ပေါ့
အဲဒါကို အဖေက
မှောင်ရိပ်ခိုကျွန်းမှာ ပင်လယ်ဓားပြတွေဆုံရင်
တစ်ယောက်နဲ့တစ်ယောက် ၀ိုင်ခွက်ချင်းတိုက်
ပင်လယ်နက်ထဲ ခုန်ချကြတော့မယ်တဲ့
ကျွန်တော်ထွက်ခဲ့တယ်
လက်နက်အပြည့်နဲ့ အိတ်ကို လွယ်လို့
(ဒစ်စပရာဒိုမင်းသားလို)
ထရပ်ကားသံတညံညံနဲ့
ကောင်းဘွိုင်မုဆိုးတွေများတဲ့မြို့ကြီးကို။
အဖေက
ဒေါက်တာဇီဗားဂိုးရဲ့ ဇာတ်ဝင်တေးကို လေချွန်လို့
ဆောင်းရာသီ သစ်ကိုင်းခြောက်တွေကြား ကျန်ခဲ့။
အခုဆို ကျွန်တော်ဟာ
ကံကြမ္မာရဲ့ လက်ကွက်အရွှေ့အပြောင်းမှာ
ကီးအမြင့်ဆုံးအသံထွက်နေရတဲ့ ဂစ်တာလေးတစ်လက်ပေါ့
အဖေ့ရဲ့ ဂစ်တာသံတွေဟာ
ကျွန်တော်အခုလိုအပ်နေတဲ့ ကရုဏာတေးသက်သက်ပဲဆိုတာ
ကျွန်တော် သိနေပြီလေ။

မောင်ယုပိုင်
မြားနတ်မောင်မဂ္ဂဇင်း